Plantun de Prouvènço

Pèr coumpara dos planto d'encò nostre

Valerianella locusta & Schistidium crassipilum

Douceto

Valerianella locusta

Caprifoliaceae Valerianaceae

Àutri noum : Grasseto, Pan-froument, Raspello, Agnelet, Lachugueto.

Noms en français : Mâche potagère, Doucette potagère.

Descripcioun :
La douceto es uno erbo fèro bèn couneigudo qu'es aro proun samenado e culido coume ensalado. Se destrìo dis àutri Valerianella qu'a quàsi ges de calice à si flour. Li formo fèro soun bluio (fotò), alor que li cultivado soun blanco (fotò peréu). Trachis dins li relarg un pau umido e sablous. S'atrobo dos varieta, l'uno à fru larg (V. locusta s.s.) e l'autro à fru mai alounga (V. carinata s.s.), vèire li dessin.

Usanço :
Forço goustouso ensalado champanello o cultivado. Dóu latin Valere, valènt à dire "se bèn pourta", la planto èi vertuouso. Es uno bono desgreissarello pèr li regime ameigrissènt.

Port : Erbo
Taio : 10 à 60 cm
Fueio : óupousado
Tipe bioulougico : Teroufite
Cicle bioulougico : Planto de l'an

Gènre : Valerianella
Famiho : Caprifoliaceae
Famiho classico : Valerianaceae

Ordre : Dipsacales

Coulour de la flour : Bluio
Petalo : 5
Ø (o loungour) flour : 1 à 2 mm
Flourido : Printèms

Sòu : Ca
Autour basso e auto : 0 à 1600 m
Aparado : Noun
Remarco : Ensalado champanello
Mars à jun

Liò : Pelouso umido - Sablo - Bos clar - Champ
Estànci : Termoumediterran à Mountagnard
Couroulougi : Éurimediterrano
Ref. sc. : Valerianella locusta (L.) Laterr., 1821

Grimìo-de-la-pouncho-espesso

Schistidium crassipilum

Grimmiaceae

Nom en français : Grimmie à pointe épaisse.

Descripcioun :
La grimìo-de-la-pouncho-espesso dóu gènre Schistidium trachis en couissin pu o mens sarra e de coulour bruno à óulivo sus li roco cauquiero. Douno de ramo irreguliero que podon faire fin qu'à 5 cm d'aut. De proumié abord se recounèis à sis urno aurenjo 'mé uno couifo pounchudo roujo un pau espesso e peréu à si fueio en lanço verd-óulivo generalamen acabado pèr un pouncho ialino. Li dènt dóu peristome soun drecho e acabado pèr un pouncho bruno. La sedo jauno à aurenjo èi courteto (0,5 mm).

Usanço :
S'atrovo au nostre d'àutri meno dóu gènre Schistidium que ié sèmblo proun coume S. elegantulum, S. robustum, S. singarense nouma group Schistidium apocarpum.